Универзитетите во Република Северна Македонија имаат клучна улога во развојот на општеството преку создавање на квалитетни кадри и обезбедување на знаење и иновации кои директно придонесуваат за економскиот, културниот и социјалниот напредок. Во тој контекст, неопходно е да се гарантира дека високото образование е транспарентно, одговорно и во служба на јавниот интерес.
Еден од основните столбови на функционирањето на универзитетите е универзитетската автономија, која е предвидена да го заштити академското истражување и наставата од политички и економски влијанија. Меѓутоа, во изминатите години се забележуваат сериозни злоупотреби на автономијата на универзитетите, особено во делот на финансиското управување, што го загрозува интегритетот на образовните процеси.
Посебен фокус на предложените амандмани е унапредување на студентските права. Сегашната правна рамка не обезбедува доволна заштита и не ги вклучува сите права кои се суштински за развојот и благосостојбата на студентите. Со зголемување на бројот на студентски права, се стремиме да создадеме поинклузивен и праведен систем кој ќе ги заштити интересите на студентите, овозможувајќи им поголема слобода на изразување, учество во процесите на донесување одлуки и пристап до квалитетно образование.
Со овие амандмани се стремиме да ги зајакнеме механизмите за отчетност и транспарентност, да ги намалиме можностите за злоупотреба и да овозможиме подобро управување со ресурсите на универзитетите. Дополнително, амандманите ќе овозможат поголема инклузивност на студентите и пошироката академска заедница во одлучувачките процеси, со цел да се обезбеди дека универзитетите ќе продолжат да играат активна улога во унапредување на општественото добро.
ПРЕДЛОГ – АМАНДМАНИ НА ЗАКОНОТ ЗА ВИСОКО ОБРАЗОВАНИЕ-3
